Trump ma fulin doonaa hanjabaaddiisa ku saabsan daah-furka mashruuca “Freedom Plus” ee ka dhanka ah Iiraan?

Diidmada Madaxweynaha Mareykanka Donald Trump ee jawaabta Iiraan ka bixisay soo jeedinta lagu soo afjarayo dagaalka ayaa dhalisay su’aalo sii kordhaya oo ku saabsan suurtagalnimada inuu fuliyo hanjabaaddiisa ah inuu bilaabo mashruuca “Freedom Plus”, kaas oo uu ku tilmaamay nuqul balaadhan oo ka mid ah hawlgal militari oo hore Mareykanku uga fuliyay Marinka Hormuz. Trump ayaa Sabtidii la soo dhaafay si dadban u sheegay in suuragal ay tahay in dib loogu laabto xulashada milatari haddii wada-hadalladu fashilmaan, isagoo yidhi: “Waxaa laga yaabaa inaan mar kale ku laabanno mashruuca Xorriyadda haddii aan heshiis la gaadhin, balse markaas wuxuu noqon doonaa mashruuca Freedom Plus, taasoo ka dhigan mashruuca Xorriyadda oo lagu daray waxyaabo kale.”

Trump faahfaahin kama bixin waxa uu ku dari karo mashruuca “Freedom” ee uu Isniintii la soo dhaafay bilaabay, balse uu Salaasadii ku joojiyay wax ka yar 48 saacadood gudahood. Trump ayaa hadallo uu siiyay saxafiyiinta ku sheegay in Pakistan ay Washington ka codsatay in la hakiyo mashruuca “Freedom” inta laga sugayo jawaabta Iiraan. Salaasadii la soo dhaafay ayuu Trump ku dhawaaqay in si ku meel gaadh ah loo joojiyay mashruuca, oo ahaa howlgal militari oo Mareykan ah oo lagu beegsanayay in maraakiibta lagu wehliyo laguna hago Marinka Hormuz si loo xaqiijiyo xorriyadda maraakiibta.

Trump ayaa sidoo kale hadallo la daabacay Axaddii, ka hor inta aanu ku dhawaaqin inuu diiday jawaabta Iiraan ee ku saabsan soo jeedinta lagu soo afjarayo dagaalka, ku sheegay in “ay tahay inaan laba toddobaad oo dheeraad ah tallaabo militari ka qaadno Iiraan, isla markaana aan garaacno dhammaan bartilmaameedyada la cayimay”. Trump ayaa hore u sheegay inuu weerari doono xarumaha korontada, buundooyinka iyo ceelasha saliidda ee Iiraan haddii aanay aqbalin shuruudihiisa lagu soo afjarayo dagaalka. Isagoo Axaddii shalay hadal ka jeediyay telefishin, Trump wuxuu yidhi: “Iiraaniyiintu waxay nagu jiitamayaan 47 sano, way naga dhigayaan inaan sugno, waxayna dadkeenna ku dilayaan qaraxyada ay dhigaan hareeraha waddooyinka, waxayna cabbudhiyaan dibadbaxyada.” Wuxuu intaas ku daray: “Mar dambe naguma qosli doonaan.”

Xabbad-joojinta u dhexeysa Mareykanka iyo Iiraan ayaa bilaabatay 8-dii Abriil ee la soo dhaafay, iyadoo markii hore loo qabtay muddo laba toddobaad ah, ka hor inta aan muddada loogu kordhin si aan xad lahayn, kaddib markii labada dhinac ay heshiis gaadhi waayeen. Trump ayaa ku hanjabay inuu burburin doono Iiraan, isla markaana uu dib ugu celin doono “casrigii dhagaxa” si uu ugu khasbo inay aqbasho dalabaadka Mareykanka. Hase yeeshee, ilaa hadda dhowr wareeg oo wada-hadal ah ayaa fashilmay; mid ka mid ah wuxuu si toos ah u dhexmaray labada dhinac, halka wareegyadii kalena lagu qabtay dhexdhexaadiyeyaal.

Ra’iisul Wasaaraha Israa’iil, Benjamin Netanyahu, ayaa wareysi uu siiyay barnaamijka “60 Minutes” ee ka baxa shabakadda CBS ku sheegay in dagaalka Iiraan aanu weli dhammaan, isla markaana ay tahay in la gaadho kaydka uranium-ka la kobciyay ee Iiraan, lana helo lana soo saaro, lana burburiyo xulafada Iiraan ee gobolka iyo gantaalladeeda ballistic-ga ah. Wuxuu yidhi: “Waxaa jira shaqo u baahan in la qabto.” Markii weriyuhu weydiiyay sida ay u soo saarayaan uranium-ka la kobciyay, wuxuu ku jawaabay: “Waan galeynaa, waana soo qaadaneynaa,” isagoo intaas ku daray in Madaxweyne Trump uu sheegay in arrintaasi “aanay dhibaato ahayn”, lana sameyn karo.

Netanyahu ayaa sidoo kale wareysiga ku qirtay in Israa’iil ay ku guuldarreysatay dagaalka dacaayadda, isagoo sababta ku xidhiidhiyay baraha bulshada, oo uu sheegay inay ka mid yihiin sababaha hoos u dhigay taageerada ay dhalinyarada Mareykanka u hayaan Israa’iil. Wuxuu yidhi: “Waxaan ku guuldarreysannay dagaalka warbaahinta, gaar ahaan dagaalka baraha bulshada… waana inaan xallinnaa dhibaatadan.”