Madaxweyneha Soomaaliya ayaa booqday Baydhabo oo uu dhawaan xoog kula wareegay

Madaxweynaha Xukuumadda Federaalka Soomaaliya, Xasan Sheekh Maxamuud, ayaa maanta gaadhay magaalada Baydhabo, ka dib markii uu dhacay isbeddel weyn oo dhinaca hoggaanka ah, iyada oo uu toddobaadkii hore halkaas iskaga cararay Cabdicasiis Lafta-gareen oo hoggaamiye ka ahaa maamulka Koonfur Galbeed.

Safarkan ayaa yimid xilli xaaladdu isbeddeshay oo ay ciidamada dawladda federaalka oo garab ka helaya kuwa deegaanku ay la wareegeen gebi ahaanba gacan-ku-haynta maamulkii deegaankaas.

​Isbeddelkan ayaan ku koobnayn keliya in la eryay hoggaamiyihii maamulkaas, balse waxa si degdeg ah loogu dhawaaqay hoggaamiye cusub oo si kumeel-gaadh ah u maamuli doona gobolka, kaas oo uu si toos ah u soo magacaabay Raysal Wasaareha Xukuumadda Madaxweyne Xasan. Tallaabadan ayaa muujinaysa sida ay xukuumadda dhexe uga go'an tahay in xoojinta awoodda ay Xamar ku yeelanayso xukuumadaha gobollada, taas oo werwer ku abuuraysa kooxaha u xagliya adkeynta hannaanka federaalka ah ee ay qaadatay Soomaaliya. Dhanka kale, waxa dood dhalisay in hoggaanka cusub ee Xamar laga soo magacaabay uu ka tirsanaa Xukuumadda Federaalka oo uu ka ahaa Raysal Wasaare Xigeen, isla markaana uu ahaa xubin Barlamaanka Federaalka oo uu ka soo galay Maamulka Jubaland, taas oo ka dhigaysa in Xukuumadda Federaalku u magacawday hoggaanka Koonfur Galbeed shakhsi aan ka soo jeedin deegaankaas.

​Arrimahan ka dhacaya Baydhabo ayaa loo arkaa in ay calaamad u yihiin daciifinta nidaamkii federaalka ee ay ku dhisnayd Soomaaliya, maaddaama oo ay jidka u xaadhay faragelin toos ah oo ay Xukuumadda Dhexe ku samayso maamul goboleedyada ilaa heer hoggaan bedel ah, iyada oo meesha ka saaraysa nidaamkii ahaa in gobolladu ay iyagu is-maamulaan, taas oo dhalinaysa in go'aanka masiiriga ah uu ka yimaado dhanka madaxtooyada Soomaaliya.

Dhanka kale, arrintani waxa ay saameyn toos ah ku leedahay qodobbadii la isku hayay ee siyaasadda Soomaaliya oo ay ku jiraan beddeliddii Dastuurka iyo doorashada soo socota, xilligan oo ay muddadu ka sii dhammaanayso hay'adaha federaalka. Isbeddelka xoogga ku dhisan ee ka dhacay Baydhabo ayaa dib u karaariyay doonista Madaxweyne Xasan Sheekh ee doorasho qof iyo cod ah iyo hirgalinta dastuurkii la beddelay, arrintaas oo sii cakiraysa siyaasadda Soomaaliya korna u qaadaysa isku-dhacyada kooxaha saameynta ku leh siyaasadda.