Cannes: Bandhigga ugu Muhiimsan Shineemada Dunida

Maanta, Bandhigga Filimada Cannes waxa loo tixgeliyaa bandhigga filimada ugu muhiimsan dunida, isagoo isku keena farshaxanka, xiddignimada iyo hal-abuurka shineemada caalamiga ah, waa dhacdo sannadle ah oo isu beddeshay madal dhaqan, warbaahin iyo damaashaad. Bisha May, magaalada Cannes ee Faransiiska, waxay isu beddeshaa caasimadda shineemada adduunka, iyadoo ay ku soo qulqulaan jilayaal, agaasimayaal, soosaarayaal, suxufiyiin iyo taageerayaasha fanka toddobaad ee dunida oo dhan, si ay ugu socdaan La Kurwaaseed-ka (La Croisette). Dhacdadan oo noqotay astaan u taagan shineemada casriga ah ee dunida.

Bandhigga Cannes, marka laga yimaaddo roogga cas ee lagu dul laafyoodo, dharka ay naqshadeeyayaasha caanka ahi sameeyaan, iyo khashaafadaha sawirqaadayaasha, waxa uu ku astaysanyahay hay’ad dhaqan iyo siyaasadeed oo door weyn ka ciyaartay qaabaynta taariikhda shineemada casriga ah, muddo tobannaan sanno ahna isu beddeshay muraayad ka turjunta isbeddellada farshaxan, dhaqan iyo siyaasadeed ee dunida.

Dhalasho ku xuddun-xidhatay siyaasadda iyo dagaalka

Bandhigga waxaa si rasmi ah loo daahfuray sannadkii 1939-kii, xilli ay cirka isku sii shareerayeen xiisadaha dagaal ee dunida. Wakhtigaas waxa bandhigga u weyn ahaa “Venice Film Festival” isagoo isla markaana ugu horreeyay dunida. Waxa ku socotay eedayn ah in ay saamayn ku lahaayeen nidaamyadii faashiistaha ee Talyaaniga iyo Jarmalka. Sidaas darteed, Faransiisku waxa uu rabay in uu abuuro bandhig xor ah oo ka madax-bannaan cadaadiska siyaasadeed.

Waxaa qorshe ahaa in bandhigga ugu horreeya la furo Sebteembar 1939-kii. Balse maalmo yar kadib markii martidii timid, waxaa qarxay Dagaalkii Labaad ee Adduunka, waxaana la baajiyay bandhiggii ka hor inta aanu si rasmi ah u bilaabmin.

Bandhigga Cannes si rasmi ah dib looma soo noolayn ilaa 1946-kii, xilli Yurub wali ku jirtay saxariirkii dagaalka. Bilowgiisii horeba, bandhiggu wuxuu doonayay inuu noqdo astaan u taagan xorriyadda farshaxanka iyo wada-hadal caalami ah oo loo marayo shineemada.

Sidee buu ku noqday Bandhigga filimada ee ugu muhiimsan dunida?

Muddo tobannaan sannadood ah, Cannes si tartiib tartiib ah ayuu isugu beddelay bandhigga filimada ugu sumcadda badan dunida. Abaalmarintiisa ugu weyn ee “Palme d'Or” ama “Laanta Dahabka ah” waxay ka dhex heshay gudaha hal-abuurka shineemada boos ku dhow qadaasad.

Helitaanka abaalmarinta “Laanta Dahabka ah” waxay awood u leedahay inay si buuxda u beddesho mustaqbalka agaasime, ama ay siiso filim madax-bannaan sumcad caalami ah, wuxuuna xoojin karaa maqaamka hal-abuuraha. Qaar badan oo ka mid ah halyeeyada shineemada ayaa sumcaddooda ka soo dhisay Cannes, waxaana ka mid ah: Federico Fellini, Ingmar Bergman, Martin Scorsese, Francis Ford Coppola, Quentin Tarantino, Jane Campion, Abbas Kiarostami, iyo Bong Joon Ho.

Bandhiggu waxa uu sidoo kale dunida u soo gudbiyey filimo noqday taariikhi, sida La Dolce Vita (1960) ee Federico Fellini, Taxi Driver (1976) ee Martin Scorsese, Pulp Fiction (1994) ee Quentin Tarantino, iyo Parasite (2019) ee Bong Joon Ho, iyo kuwo kale.

Bandhig u dhexeeya farshaxanka iyo hal-abuurka

Mid ka mid ah waxyaabaha sooca ka dhigaya Bandhigga Cannes waa wejigiisa laba-geesoodka ah. Dhinac, bandhiggu wuxuu difaacaa shineemada hal-abuurka leh, shaqooyinka himilada sare leh, tijaabooyinka farshaxanka iyo filimada mararka qaar ka yimaadda dalal aan si weyn uga muuqan waxsoosaarka shineemada caalamiga ah.

Dhinaca kale, Cannes waa suuq dhaqaale oo aad u weyn. “Suuqa Filimada” wuxuu sannad kasta isku keenaa soosaarayaal, qaybiyayaal iyo baraha baahinta tooska ah si ay uga wada xaajoodaan heshiisyo go’aamin kara masiirka boqollaal filim. Si kale haddii loo dhigo, Cannes waa dhacdo dhaqan marka hore, sidoo kalena waa xarun istiraatiiji u ah dhaqaalaha shineemada dunida.

Cannes iyo Netflix

Bandhiggu waxa uu maray isbeddello waaweyn tan iyo kontamaadkii qarnigii hore. Inkastoo bilowgiisii uu ahaa mid Yurub un ku kooban oo ay maamulayeen quwadaha shineemada reer galbeedka, Cannes wuxuu si tartiib ah ugu furmay dunida inteeda kale. Shineemooyinka Aasiya, Afrika, Carabta iyo Laatiin-ka ayaa maanta boos muhiim ah ka haysta.

Bandhiggu waxa uu sidoo kale ku qasbanaaday inuu la jaanqaado isbeddello waaweyn oo ay ka mid yihiin: caalamiyeynta dhaqanka, soo bixitaanka baraha sida Netflix, doodaha la xidhiidha kala-duwanaanta, dhaqdhaqaaqa #MeToo ee ka hortagga tacaddiyada iyo faraxumaynta jinsiga gaar ahaan dhinacyada farshaxanka, warbaahinta iyo siyaasadda, qalalaasaha siyaasadeed iyo jiyosiyaasadeed, iyo safmarkii COVID-19.

Mid kamid ah doodaha bandhiggu wajahay waa booska la dhigayo baraha tooska u baahiya filimada. Sannadkii 2017-kii, ka qaybgalka filimo ay Netflix soo saartay ayaa dhaliyay muran weyn gudaha bandhigga. Arrintaasi waxay ku dhammaatay in Cannes dejiyo xeer dhigaya in filim kasta oo ka qayb galaya tartanka bandhigga laga shido shaashadaha shineemooyinka Faransiiska.

Go’aankan, wuxuu ka turjumayaa rabitaanka bandhigga ee ah in uu difaaco xaqa dadku u leeyihiin in ay helaan daawasho wadareed iyada oo laga hor tagayo isbedallada baraha dhijitaalka ah.

Awoodda astaanta u ah Cannes: “fuulista jaranjarada”

“Fuulista jaranjarada” caanka ah waxay isu beddeshay mid ka mid ah sawirrada ugu astaanta badan dhaqanka bulsheed ee dunida. Casuumaad in uu qofku ka helo Cannes waxay inta badan ka dhigan tahay ka mid noqoshada nooc ka mid ah aqoonyahannada dunida ee xulka ah. Bandhiggu waxa uu u shaqeeyaa sida mashiin soo saara sumcad, haybad iyo mararka qaar xitaa halyeeyo.

Muddo sannado ah, shakhsiyado sida Brigitte Bardot, Sophia Loren, Alain Delon, Catherine Deneuve, Meryl Streep, iyo Leonardo DiCaprio ayaa gacan ka geystay dhismaha sawirka haybadda leh ee Cannes.

Maanta iyo bandhigga Cannes: haybad iyo su’aalo ku wareegaya

Inkasta oo uu leeyahay saameyn aad u weyn, bandhiggu wuxuu si joogto ah ula kulmaa dhaleeceyn. Waxa lagu eedeeyaa inuu yahay mid u janjeedha dadka awoodda leh oo keliya, ama inuu leeyahay jiliin liita, ama in uu si xad-dhaaf ah ugu dhow yahay waxsoosaarka tadhahay iyo shirkadaha ganacsi ee waaweyn. Dhanka kale, kuwo kale waxay aaminsan yihiin in Cannes wali yahay mid ka mid ah goobaha kooban ee shineemada hal-abuurka leh ay ka heli karto baahin caalami ah xilli ay maamulayaan shirkadaha waaweyn ee Hollywood iyo algooriitamka baraha dhijitaalka ah. Xiisaddan u dhexaysa dhaqanka iyo casriga ayaa maanta noqotay xudunta aqoonsiga bandhigga laftiisa.

Bandhigga Cannes wuxuu noqday muraayad ka turjumaysa isbeddellada dhaqan, siyaasadeed iyo dhaqaale ee dunida casriga ah. Ku dhowaad siddeetan sanno kadib asaaskiisii, bandhigga Filimada Cannes wali waa dhacdada ugu weyn dunida shineemada, iyo muraayadda isbeddellada farshaxanka, dhaqanka iyo hal-abuurka shineemada caalamiga ah.